國足遊南美歎細界
2012/09/10文:Mic少
明早有場矚目國際熱身賽，巴西主場對中國，表面上「森巴兵團」高幾班波，但要留意佢哋唔需要踢世界盃外圍賽，領隊文奴文尼斯仍可從容為球隊試陣，今仗鬥實力次一級嘅國足，或會輪換畀一班邊緣國腳上陣，因此不宜高估。中國隊近期鬥名牌球隊，往往踢出超水準僅敗，Mic少認為主W毫無投注價值，大細中位數3.5球，可捧入球細。

巴西身為2014年世界盃主辦國，可直入決賽周，主帥文奴文尼斯仲有大把時間試陣，希望搵出最佳人腳及戰術，對勝負未必太着緊。巴西日前熱身賽都係踢到比賽末段先至靠侯克入波小勝南非1比0，可見佢哋爭勝決心麻麻。

森巴主將或休息
由於同上場熱身賽只相隔幾日，文奴文尼斯今場好可能畀尼馬、拉美利斯及李安度達美奧等主力休息，改派副選應戰，實力及默契難免打折扣。而且一班歐洲兵周末有聯賽後顧之憂，即使上陣亦會留有一手，實在唔可以睇得太高。

至於中國隊近期鬥勁旅毫不失禮，六月作客西班牙都只係輸0比1，日前同有伊巴謙莫域助陣嘅瑞典交手，亦都係以同樣比數落敗，有晒交代。

中國遇強頂得兩嘴
不過，國足進攻中場鄭智上仗熱身賽，被對手踢傷嘴部，已經回國，左中場于漢超因為膝部受傷，肯定無法披甲，主帥甘馬曹應會改用較防守性踢法抵擋巴西。另一位中場蒿俊閔解決簽證問題，已飛赴巴西同大軍會合，有助甘馬曹調動，但兵源不足，難有反抗能力。

值得一提國足上次同巴西踢熱身賽打和0比0，所以就算國足今場輸波亦未必大敗。「讓球主客和」巴西讓兩球，「讓球主勝」有暗湧，捧入球細。