林柏特士哥追笠臣
2012/09/11
上仗英格蘭大炒摩爾多瓦之役梅開二度嘅林柏特，謙稱自己唔係必然正選，雖然英軍人才輩出，加上近年傷患不斷，但佢從未諗過退出國家隊，因為有老竇力撐佢喎！

老竇撐場永不言退
今夏因傷缺席歐國盃決賽周後，令人猜測林柏特喺英格蘭國家隊時日無多，不過佢用實際表現，去還擊批評佢又老又慢嘅言論。林伯坦言自己唔係「三獅兵團」必然正選，因為主力位置是靠表現爭取返嚟，所以佢接受主帥鶴臣嘅任何決定，包括做後備。

不過，講到退出國家隊，林柏特則斷然拒絕：「我老竇總係鼓勵我為英軍踢波，佢強調只要我仲有能力為球隊作出貢獻，就唔好輕言放棄，因此我依家仍未有退役念頭。」連埋日前兩個入波，林伯已經為英軍取得25個士哥，只係差名宿笠臣同柏列1球，恰巧三人都係入球率高嘅攻擊中場，呢位34歲老將依然老而彌堅。