華盛頓聯隊起革命
2012/09/15文:艾森曼嘉

射手回歸搶季後賽入場券
華盛頓聯隊現時正為季後賽席位踩行油，明早主場迎戰新英倫革命必定以全取三分為目標。最近華盛頓已重拾季初雄霸東岸榜首的出色狀態，加上前鋒馬爾干山度士復出，有力開出主W。

華盛頓聯隊中場史提芬京治因為接受手術根治疝氣問題，有可能提早收咧。另一方面，迪贊積高域與迪羅沙里奧踢完國際賽後歸隊，今仗亦可上陣，最重要是曾經在六場賽事攻入六球的前鋒馬爾干山度士，缺陣八月大部分賽事後，將於今仗回歸，為球隊帶來需要的爭勝火花。新英倫革命攻擊中場祖安杜查已隨隊操練，有望於今仗披甲，同時洪都拉斯國腳謝利賓特臣踢完國家隊賽事後回歸，可候命出戰。

革命教練打亂章
新英倫革命上輪意外地以二比○擊敗哥倫布機員，終止連續十場聯賽不勝走勢，今仗對華盛頓聯隊當然希望再下一城，不過革命教練希比斯每仗都會更改正選陣容，令部分球員難以適應，就算上場贏波，亦恐怕會對球隊造成反效果，今場我會較為睇好主隊。