AC殘陣蘭讓波
2012/09/15文:巨高

周日凌晨有兩場意甲，其中上季聯賽亞軍ＡＣ米蘭主場對阿特蘭大。ＡＣ流失兩大主力堤亞高施華及伊巴謙莫域後，實力確實大不如前，加上陣中唔少球員處於養傷期，今場好難讓起對阿特蘭大，「讓球客勝」可捧。

ＡＣ受到傷患問題困擾，除巴西孖寶柏圖及羅賓奴外，中場蒙杜利禾、蒙達利及右閘阿比迪都唔出得，連柏仙尼都話經國際賽後有傷暫未能正常操練。因ＡＣ傷兵太多，據報今場要用到質素一般嘅法蘭斯高阿沙比擔任中堅，考慮到ＡＣ後防極之薄弱，未必抵擋得住阿特蘭大攻勢，加上「紅黑兵團」下周要出戰歐聯，或多或少會影響球隊部署。

今季阿特蘭大要扣兩分起步，當然希望盡快取分追回失地，故爭勝鬥志毋須懷疑。況且兩支球隊地理位置接近，對於作客嘅阿特蘭大影響輕微，今場受讓可留意「讓球客勝」。

巴勒莫返地頭博開齋
另外，較早時間有巴勒莫主場對卡利亞里，前者近兩場聯賽遇到強手，未有分落袋可以理解。今輪巴勒莫有番主場之利，而且對手卡利亞里又欠近績支持，相信巴勒莫今晚有望打開勝利之門。巴勒莫近五次主場對卡利亞里取得4勝1和佳績，今場值得睇高一線。