利物浦飄忽難捉摸 鬥新特蘭玩大好過
2012/09/15文:WENDY
正所謂：「想要生活好，咪掂利物浦！」今季我都畀呢隊波害咗兩次，先係買曼城作客贏佢，偏偏呢場紅軍踢出超水準，仲差啲贏埋曼城添！之後當大家以為佢哋會食住度氣勢贏埋阿仙奴之際，佢就輸畀你睇！究竟「利記」你係咪同我哋投注者有仇先？今晚利物浦就會北上光明球場作客「黑貓」新特蘭，兩隊開季同樣未贏過，今晚博首勝一定去盡，寧買入球大都好過買「利記」喇！

紅軍讓波信唔過
初步睇賠率，「紅軍」贏波熱過主隊，好多莊開利物浦讓平半，我就唔明點解仲開得出呢個盤口。「紅軍」開季作客先食咗西布朗3蛋，下周中又有歐霸跟尾，加上成日強調佢哋作客都係累人輸錢，莫非莊家真係收到「堅料」？唔理佢哋贏唔贏到啦！總之「哨牙蘇」蘇亞雷斯、波連尼、史達寧等等乖乖哋同我入多啲波就得喇！