曼城為「細」所逼
2012/09/15文:蘇豪
英格蘭老金童奧雲「降呢」加盟中型班史篤城，今晚有望於主場對曼城一戰處子登場。史篤城增兵後戰鬥力進一步提升，而且近五次主場對曼城未輸過，賽績好硬淨！曼城前線缺少巴洛迪利，王牌射手阿古路亦上陣成疑，火力唔夠，預期今戰入波唔多，捧細！

作客史篤城全細
曼城近五次作客史篤城都贏唔到，五場都開細，呢個數據好有參考價值。

奧雲今夏畀曼聯放棄，最終決定加盟史篤城，希望喺呢支中型班重新起步。史篤城鋒線競爭唔細，正選中鋒係高治同堅韋尼鍾斯之爭，奧雲就要同約拿芬禾達斯及謝路美爭另一個位，論活力同速度，奧雲唔及兩個競爭對手；但佢勝在經驗豐富，埋門一腳處理淡定，今戰料會先做後備。

史篤城另兩大新兵尼桑斯同查理阿當都係好嘢，前者夠硬淨，後者上季効力利物浦評價麻麻，但打中型班啱晒Key，分波工作做得好，本來班波中場已經好有效率，依家調動空間更大。進攻方面，史篤城以往靠手榴彈戰術製造唔少威脅，但依家戴納年事已高，落場機會唔多，接班人梳頓亦非必然正選，少咗瓣進攻板斧，對住曼城都會以守為先。

下周中歐聯撼皇馬
曼城射手巴洛迪利做完眼部手術今仗休戰，阿古路傷愈復操冇耐狀態不足。曼城中場靠耶耶托尼同拿斯尼造波同士哥，前面由泰維斯衝鋒陷陣，班兵未在最佳狀態，幸好前史雲斯前鋒史葛冼佳亞、前賓菲加中場查維加西亞同前國米右閘馬爾干等早已操起，加上下周中要喺歐聯作客皇家馬德里，今場可靠呢班新兵孭飛。

歐聯分組賽下周中開戰，大家研究各球隊聯賽勝負，必須多一重考慮，未必全部留力，要逐場分析。