祖記顧住架車信唔過
2012/09/16文:SAMVO肥叔

因周中有歐聯及歐霸盃賽事舉行，令周日賽事較為平淡，但既然身為專業投注者，根本唔會在乎賽事戲碼，反正具投注價值嘅賽事，多數都係遠離眾人視線。

熱拿亞主場偷雞
講番今日心水，率先同大家傾吓意甲熱拿亞主場對祖雲達斯。自從去季以不敗佳績贏得聯賽冠軍後，祖雲達斯有番晒以往嘅叫座力，或因受到名牌效應所影響，現時祖雲達斯相關賠率普遍被壓低，大大影響值博率，再加上祖雲達斯並非一支穩陣球隊，上季亦經常喺作客環境下失分，今場要讓波有一定風險，下盤捧得過。

祖雲達斯去季喺聯賽交到好成績，全因球隊毋須兼顧歐洲賽，但今季有意甲及歐聯兩條戰線，或多或少會打亂部署。尤其周中歐聯對手係車路士，祖雲達斯更加唔敢掉以輕心，今場聯賽或會勒住踢。此外，祖雲達斯屬意大利國家隊大戶，所謂「FIFA病毒」隨時會傳染到球隊身上，今場演出走樣唔奇，作客讓波當然唔抵。熱拿亞喺暑期大換血後，實力有所提升，今晚有主場之利唔可以睇小。

另外拿玻里主場對帕爾馬，心水推介上盤。拿玻里近季進步幅度大，今季有力挑戰頭三位；帕爾馬輸級數，加埋作客因素更加唔樂觀。