法蘭克福開胃擦漢堡
2012/09/16文:阿Kit

好多聯賽喺新球季，往往都會有支神奇球隊跑出。例如前季德甲慕遜加柏明明差啲降班，但上季就踢到曉飛，球迷拍爛手掌！唔知今季德甲嘅神奇球隊，係咪「升降機」法蘭克福呢？佢哋至今兩戰全勝，而且無論係贏利華古遜或大炒賀芬咸，表現都極有說服力，今晚主場對漢堡一於撐主勝，博法蘭克福再下一城。

漢堡積弱左閘穿窿
漢堡呢隊波真係嚇死球迷，上季嘅低潮延續至今都未有起色。聯賽開季兩連敗，係德甲唯一未入波球隊，德國盃又畀卡爾斯魯厄掃出局，真係失禮死人。論人腳漢堡實力唔算好，加上成班波踢起嚟冇火花，就算有雲達華治回歸，但短時間內好難同隊友建立默契。計埋上季季尾，漢堡已經連續四場聯賽零入球，今輪作客當頭勇嘅法蘭克福，形勢當然差。

法蘭克福勢頭好，教頭艾明費就搞笑咁話，如果球隊今季攞唔到德甲冠軍佢會好失望，今戰亦都係佢首次領軍倒戈漢堡！其實大家都知呢啲二線波都係打道氣，一早贏盡攞夠分護級當然最理想。佢哋入球來自一條中場線，而且分布得非常平均，頭兩場波已經係同一班球員上陣，今晚應該原陣繼續殺落去！而客軍左閘艾奧高因為感冒避戰，令漢堡防線更弱不禁風，今晚一於追法蘭克福三連勝！