前鋒達維着火風林強勢捕鳥
2012/09/17文:蘇豪
日乙鬥到最後直路，榜首形勢漸見明朗，甲府風林甩開第三位大分三神九分，有望取得直接升班席位。風林王牌前鋒達維愈戰愈勇，近三場聯賽包辦球隊五個士哥，現時以廿五球高據射手榜榜首，今輪主場對弱旅鳥取飛翔會繼續數胡，可助球隊大勝對手，要「讓球主勝」！

鳥取飛翔難抗勁旅
達維07年喺日乙効力札幌岡薩多，當年轟入十七球助球隊殺上日職，表現搶鏡！達維今季演出更上一層樓，聯賽上陣三十場入廿五球，喺射手榜拋離次席東京綠茵球星阿部拓馬十球，做日乙神射手只係時間問題。達維近三場聯賽包辦風林五個入波，勒都勒唔住，今場將成對手防線心腹大患。

鳥取飛翔近兩仗主場出擊都贏波，表現似乎已有進步，不過，呢隊波作客踢落差好遠，現時客場成績係日乙最曳，十六戰輸十二場，而且遇強愈弱，面對山形山神、千葉市原同京都不死鳥等前列球隊都係輸兩球或以上，冇乜反抗能力，今場大敗機會極高，可捧「讓球主勝」。