貝迪斯叉足電發神經
2012/09/17文:法達斯維
今晚西甲獨腳戲，升班後表現唔曳嘅華拉度列，喺主場迎戰「神經刀」貝迪斯，由於後者經常出奇不意，實在唔能夠用常理去解讀呢隊波，加上主隊中場奧斯卡干沙里斯上陣成疑，讓波信唔過，喺逆思考下捧「讓球客勝」最穩陣。

環顧今季三支升班球隊，以開咧3戰取得2勝嘅華拉度列成績最好，呢隊波有自知之明，先做好防守圖站穩陣腳，呢招證明有效，頭兩仗更力保不失。當然，過於強調防守，難免會變得守強攻弱，華軍嘅3個入波中，有兩球來自12碼，最重要係中場指揮官奧斯卡干沙里斯因傷未必趕及披甲，進一步削弱該隊嘅前場組織力。

貝迪斯飄忽熱反冷敲
每個聯賽都有些唔按常理出牌嘅球隊，西甲則有貝迪斯，上季已經大起大落，今季貫徹獨有風格，該隊可以作客轟入畢爾包5粒，返回主場對華歷簡奴竟然反勝為敗，呢隊波咁鋤強扶弱，便得出一個結論──熱反冷敲。

除咗「神經刀」特性外，貝迪斯於國際賽周之前對馬體會之役臨時取消，令佢哋抖夠叉足電，主力如魯賓卡斯度、佐治摩連拿及普素路等亦傷疲盡起，火力重現，作客至少能夠全身而退，今仗仲有得受讓，「讓球客勝」捧得過，進取啲可直取客勝。