爆炸頭大作戰
2012/09/17文:蘇豪
英超獨腳戲愛華頓主場大戰紐卡素，愛華頓個陣愈執愈靚，兩大新兵賴史密夫同米拿拉斯表現對辦，主帥莫耶斯將爆炸頭費蘭尼推前一格打前鋒更屬妙着！但今場讓到半一太多喇，上盤揀唔落手。「喜鵲」後防天殘地缺，前面就齊腳，被迫以攻代守，今場玩大最好！

愛華頓教頭莫耶斯以蔗渣價錢組軍，踢出陣陣燒鵝味道，今夏晨早免費簽入蘇格蘭同鄉賴史密夫，其後以1,500萬鎊高價放走小將魯迪維爾，跟手用六百萬鎊買個比利時當打箭頭米拿拉斯，兩個新兵實而不華，好使好用！此外，莫耶斯變招都好醒，澳洲頭槌王卡希爾離隊後，佢將防中費蘭尼推前拍住謝拉域攻堅，費蘭尼頂上功夫一流，開咧戰成功頂死曼聯，依家喺前線二傳同攻門都好有威脅，莫帥一個小小微調已見功架！

車仔3千萬鎊撬人
費蘭尼喺國際賽檔期忽然表示有機會離開愛華頓，即時引來車路士同曼聯等球會注意，英國傳媒更盛傳「車仔」想出3000萬鎊撬人， 落都幾誇張！費蘭尼無啦啦扭計，無非都係為錢，無論佢最後去向係點，最快都要1月先離隊，如果真係有人出3,000萬鎊咪放人囉，反正球隊前線大把人用，「拖肥糖」粉絲唔使太擔心。軍情方面，中場吉遜受傷休戰，其餘主力都冇傷冇病，相當齊腳。

紐卡素防線告急
紐卡素防線出現傷兵潮，門神告魯斯、守將賴恩泰萊同丹尼森遜都要養傷，中堅高洛仙尼有傷在身，即使勉強落場，戰鬥力亦要打折扣。另外，迪奧迪難望趕及復出，呢個防中掃蕩能力強，冇佢中場未必夠搶。紐卡素「黑雙煞」柏比斯施斯同丹巴巴亞開季演出麻麻，但始終有分量，配合左腳王賓艾化，攻力仍有保證。翻查往績，兩隊近5次於葛迪遜公園球場交手4場開大，追多口大啦！