阿仙奴小讓筍
2012/09/18文:蘇豪
英超名牌阿仙奴於歐聯分組賽B組出師，作客上季法甲盟主蒙彼利埃，「兵工廠」今夏撬走蒙彼利埃王牌中鋒基奧特，呢個二五仔今場可為教頭雲格提供好多有用情報。蒙彼利埃失去基奧特後走晒樣，個陣至今仲未執掂，加上欠缺歐聯經驗，可以繼續反，阿仙奴作客小讓平半照捧上盤！

蒙彼利埃上季爆大冷於法甲封王，射手基奧特係頭號功臣，會方今夏留唔住佢，改簽阿根廷前鋒艾曼紐靴里拉頂替，不過交接過程唔多順利，開季5場聯賽只贏1場，今仗仲有另一進攻主力烏達卡養傷，情況更難樂觀！

普多斯基孭到飛
阿仙奴今夏同樣失去王牌前鋒尹佩斯，但搵到普多斯基同基奧特兩個頂一個，前者較快融入球隊，現已成為進攻重心，後者暫時未踢出水準，但今戰可充當間諜，助教頭雲格分析蒙彼利埃踢法同戰術。基奧特質素唔差，但目前未踢起信心，今次對番班舊戰友，睇吓可唔可以表現自已應有水準。

阿仙奴開季頭兩場聯賽和波後，近兩場成功贏波，上仗更以6比1狂數修咸頓，兩大中場辛迪卡索拉同阿迪達愈夾愈熟，為其他隊友製造大量埋門機會，以蒙彼利埃近期嘅演出，實在頂唔住「兵工廠」嘅猛攻，主場受讓仍然信唔過。

基奧特倒戈 心情複雜
阿仙奴作客蒙彼利埃，相信焦點一定離唔開阿仙奴嘅法國前鋒基奧特。去季基奧特以21個入球，與聖日耳門嘅利尼並列法甲神射手，兼協助蒙彼利埃首奪聯賽冠軍，如今以阿仙奴球員身份重返舊東家比賽，心情相當複雜。

身形高大嘅基奧特表示，之前冇諗過離開蒙彼利埃，但阿仙奴領隊雲格親自向佢招手，令佢無法拒絕：「我最欣賞雲格，特別係佢別具一格嘅足球哲學，真係充滿魅力。」對於今次倒戈，基奧特話雖然蒙彼利埃依家喺法甲成績差勁，但佢好清楚呢班波每遇最艱難時刻就會大爆發。因此阿仙奴絕對唔可以將對手視之弱旅，否則就要付出代價。