希比領軍巴迪搵里笨
2012/09/19文:Mic少
白俄羅斯球隊巴迪喺本土聯賽所向披靡，已連奪六季聯賽冠軍，因此近年成為歐洲賽常客，包括今屆在內，近五屆歐聯有三次打入分組賽，但仍然未贏過波。巴迪今季簽下前阿仙奴中場希比，目標直指分組賽第一勝。

巴迪08/09年度球季首次進身分組賽，六戰取得三和三負，包括兩次打和意甲勁旅祖雲達斯。上屆同巴塞隆拿及AC米蘭同組，獲得二和四負，曾經打和AC，可見佢哋並唔怯場，只係缺乏經驗。會方今季簽下曾効力史特加、阿仙奴及巴塞隆拿嘅白俄國腳希比，希望利用佢多年大賽經驗，為球隊注入爭勝本錢。

F組中里爾最好恰
由於F組拜仁慕尼黑及華倫西亞實力明顯較高，巴迪想獲得球隊史上首場歐聯分組賽勝仗，今晚作客里爾，以及次循環主場對呢支法甲球隊，將係佢哋開齋最佳時機，巴迪今仗受讓，要「讓球客勝」。