奇兵登場嚇你一驚!
2012/09/19文:麥馬拿仁
歐洲足協會長柏天尼推行「鋤強扶弱」政策以來，歐聯已非純為豪門俱樂部，弱國細球會亦有出頭天！上屆就有一支「不明物體」尼科西亞殺入八強，成為一時佳話。今屆三路異軍洛斯查蘭特、巴迪及克盧日接力，躊躇滿志準備上演球迷奇遇記，力爭為大家帶來驚喜，記得望多佢哋幾眼喇！

1991年，丹麥北部城市法林兩支球隊合併成法林保高比，到2003年正式易名為洛斯查蘭特，呢支球隊歷史絕不悠久，但近10年成績大幅提升，到去季力壓老牌勁旅哥本哈根奪得聯賽冠軍，今屆首次打入歐聯分組賽Ｅ組。

小盧特立孭起洛軍
睇番球隊人腳，幾乎全部名不見經傳，最大名係中場安達斯盧特立，呢名21歲中場係丹麥名宿米高盧特立之子，曾經効力皇馬Ｂ隊，於陣中舉足輕重，但出到歐洲大舞台就唔多夠班。呢班波喺國內也文也武，但一條防線未必頂唔住列強猛攻。

洛軍今輪處子登場作客烏克蘭薩克達，佢哋歐聯經驗等於零，入到分組賽全因奪國內冠軍直入到嚟，反觀薩克達主場威力極強，今場一定向洛斯查蘭特進攻，預計今戰入波唔會少，捧大。