拜仁着火主場炒得起華倫
2012/09/19文:車車 
 

歐聯分組賽嚟到第2日，唔知昨晚皇家馬德里對曼城大家係咪贏到笑呵呵？無論戰果點都好，今晚繼續有多場好戲碼。當中我揀F組賽事上屆亞軍拜仁慕尼黑主場鬥華倫西亞作為心水推介，捧入球大同主勝。

文迪蘇傑幫到手
睇開拜仁嘅球迷都知呢隊正一衰波，癲起上嚟大炒你，Hea起上嚟就真係睇到想打爆電視機！好彩今季開鑼以來佢哋踢3場德甲都尚算對辦，開咧戰贏升班球隊格雷特霍夫有啲勉強，第二場對史特加腳風順晒，重拾王者風範，到上星期對緬恩斯，以為佢哋會為歐聯留力收油，但一樣照贏3比1，認真犀利。

講真，拜仁踢嚟踢去陣式變化唔大，但勝在球員質素平均，好似場場有波入嘅克羅地亞國腳文迪蘇傑，佢嘅加盟幫到球隊唔少；跟住要數就梗係湯馬士梅拿、舒韋恩史迪加、卻奧斯等好球員啦！

拜仁3場聯賽入咗12球冠絕德甲，睇嚟只要keep住個勢，重奪德甲冠軍唔難。今場佢哋有主場之利，而班球員休息時間亦充足，可謂天時地利人和齊晒，一於趁主場博大勝搞掂華倫西亞響頭炮啦！

開季3捷入12球
反觀華倫西亞喺西甲4戰1勝2和1負成績麻麻，但難怪嘅，因為一開季就要連續作客兩大班霸，結果先和皇馬後負巴塞，好在上場對切爾達贏番場，出發德國前叫做壯一壯行色，但論氣勢華倫就點都唔夠拜仁嘞，加上作客更睇低一線。

01年決賽 拜仁射贏12碼
兩軍於歐聯歷史上只鬥過1次，就係於01年喺米蘭聖西路球場上演嘅決賽。法定時間雙方由艾芬保、文迪達各入1個12碼打成各1平手，加時兩無紀錄，最終要互射12碼。

頭5輪2軍打成3比3平手，去到「突然死亡」第2輪互射，拜仁連基中鵠，但華倫球員就宴客，最終將冠軍拱手相讓。而當年宴客嘅「罪人」，正正就係現時華倫主帥比歷基奴，今次11年後再遇拜仁，比帥自然百般滋味在心頭。