歐霸盃分組賽今晚開打，黑柴兩位歐陸戰友Louis同Alwin都認為，呢個賽事遠比歐聯開放，多支歐陸弱旅希望藉呢個舞台揚名立萬，而四大聯賽勁旅就視呢個盃為磨練新人同觀察後備球員狀態嘅場合，戰情唔會好似歐聯咁緊張，亦冇咁膠着，所以都集中向大盤埋手，希望今晚一齊食大茶飯。

今晚Louis揀咗三場有好分頭嘅歐霸盃大盤畀大家參考，首選場次係A組瑞士年青人主場對英超利物浦。主隊波如其名夠晒年輕富朝氣，無論對任何對手都充滿進攻意識，面對急於攞番自信嘅紅軍會係對攻好戲，2.15倍入球大係Louis出擊重心。

大家睇見Louis推介利物浦大盤都會存有問號，呢班波近期都係開細盤多，尤其喺歐霸附加賽兩戰蘇超弱旅赫斯，無論演出同入球數字都令人失望。不過目前情況唔同，從上仗佢哋主場對赫斯都派出大部分主力，可見佢哋唔係有心放棄歐霸盃，只係對手用901戰術，令組織能力一般嘅紅軍好難咬得入，但今場對手踢法完全唔同，須知兩隊都處於死亡之組，同組嘅安治同烏甸尼斯都非泛泛之輩，想爭呢組出線，兩隊都要以三分為目標。

紅軍踢完今仗不足三日要喺聯賽硬撼死敵曼聯，今仗一定會玩輪換，但基於聯賽成績低迷，今晚遇弱旅點都要喺對曼聯前攞番氣勢同信心，德國小將前鋒耶斯爾於國際賽表現一流，今晚好大機會會落場爭士哥。

不過，今場捧大盤嘅主要原因係主隊年青人嘅踢法，佢哋任何時候都有前冇後，就算喺水準唔高嘅瑞士超級聯賽，成績都大起大落，皆因前面入到波之餘，防線亦曳，所以表現同成績飄忽到暈。佢哋上圈首回合作客領先丹超米迪蘭特三球，以為坐定粒六，次回合返主場都幾乎晚節不保，真係估佢唔到。佢哋抽到呢組擺明係最弱球隊，但好在全無壓力，今晚主場必會爭取主動，唔會好似赫斯咁龜縮，有利紅軍打反擊，入球大有好分頭咪錯過。

利物浦嘅17歲翼鋒史達寧人細鬼大，被爆16歲已經搞大過兩個女人個肚，佢現任女友23歲嘅Melissa更喺兩個月前為佢誕下囡囡，證明佢無論場內場外嘅「表現」都比同齡後生仔大超班！

年青人大 ★★★★★

費倫巴治大 ★★★

馬里博爾大 ★★★