紐堡法福日援「大」對決
2012/09/21文:蘇斯黑柴

德甲獨腳戲紐倫堡主場鬥法蘭克福，兩軍今季表現都令人驚喜，雙方日援清武弘嗣同乾貴士近期都係風頭躉，今晚對決大有睇頭，但兩軍防線都唔算穩陣，黑柴推介1.72倍入球大。

紐倫堡今季三戰兩勝一和保持不敗，近期賽和上季冠軍多蒙特同作客擊敗勁旅慕遜加柏，狀態大勇，尤其日援清武弘嗣上仗取得一個入球兩個助攻，幾乎可以話獨力擊潰對手，已被冠以「香川二世」稱號，球隊信心爆棚又有主場之利，今仗當然乘勝追擊搶攻。

清武弘嗣決戰乾貴士
法蘭克福比紐倫堡更勇，呢支升班球隊至今三戰全勝，自然會堅持本身主攻踢法，加上日援乾貴士搶鏡到暈，頭兩場對利華古遜同賀芬咸先後交出助攻，上仗對漢堡做埋入波功臣，今仗遇上同鄉清武弘嗣，貨比貨自然會加多兩錢肉緊一決高下，雙方近期入得又失得，狀態都處巔峰，今晚對撼入球又點會少？