愛斯賓奴做慣急先鋒
2012/09/22文:法達斯維

今晚西甲有場神經刀大對決，貝迪斯坐鎮主場迎戰愛斯賓奴，前者出晒名估佢唔到，連愛斯賓奴都受到感染，今季經常先開紀錄，但後面又守唔住，踢法極有娛樂性，既然愛軍咁鍾意做急先鋒，不妨博該隊成為「第一隊入球」。

愛斯賓奴由於莫財，一向靠「賒借度日」，但上季演出sharp醒嘅借將華迪美韋斯同菲臘比古天奴要物歸原主，該隊只能入一些過晒氣嘅平價貨如沙保沙同卡迪維拿頂檔，今仗仲有沙治奧加西亞、巴爾拿、菲臘比馬迪安尼、哥洛圖等傷兵一大籮，搞到教頭普捷天奴頭都痕埋。

博「第一隊入球」捧埋大
可能係搶分心切，愛斯賓奴今季有個特性，總係「前勁凌厲」，於比賽初段住搶攻，近三仗均先開紀錄，仲入咗五粒咁多，證明該隊攻力唔曳，捧佢哋「第一隊入球」好路。可惜愛軍太過攻強守弱，後防異常不穩，已連場被對手喺比賽末段逼和，甚至反勝，而貝迪斯坐擁魯賓卡斯度同佐治摩連拿兩大射手，唔愁冇波入，呢啲癲鳳鬥狂龍嘅場合，捧埋大盤最穩陣。