給羅渣士多一點時間
2012/09/23文:黃興桂

星期日有兩場英超大戰，球迷真係過足癮。頭場先有「雙紅會」，由利物浦主場對曼聯，至於較後時間上演去季聯賽冠軍曼城主場對阿仙奴。兩場比賽Peter都估會打和。細細注整條2串1和波過關玩吓，可收刀仔鋸大樹之效。

先講利物浦主場對曼聯，最近好多人話利物浦新帥羅渣士唔掂，執教名牌球隊即刻現晒形，但Peter就唔係咁睇。其實利物浦季初賽程都幾慘，要喺短時間之內對幾支爭標強隊，好難期望羅渣士可以交到超卓成績。所以利迷應有遠大目光，畀時間羅渣士執靚紅軍。為今場大戰，羅渣士喺歐霸盃刻意收起主力，擺明要喺曼聯身上取得今季首場英超勝利，配合埋晏菲路球場氣勢，今場有力同曼聯力拚到底。曼聯上周中歐聯派強陣出戰，體力上稍稍輸蝕。再講，現時只不過係季初階段，相信曼聯領隊費格遜都唔會對和局感到太失望。

曼城主場對阿仙奴，前者有質素而未踢出冠軍球隊應有霸氣，要贏阿仙奴似有多少難度。而阿仙奴作客係差少少，但勝在普多斯基及謝雲奴腳風大順。

前鋒順開就點射都入，真係唔到你唔服。曼城有主場之利，阿仙奴又踢到順晒。既然各有可取之道，今場最終打和又有乜出奇呢！