慕遜攰爆利華Ｗ穩開
2012/09/23文:阿Kit

今晚係英超嘅超級星期天，兩場大戰肯定最吸引，我哋有線電視亦安排咗尾場曼城對阿仙奴以3D直播，球迷們記得預備定副立體眼鏡啦！除咗英超，今晚德甲都有場利華古遜對慕遜加柏，啱晒唔跟大隊睇波嘅球迷！

利華古遜今屆名義上係雙領隊領軍，不過落到球場主要都係由希比亞話事，上屆季尾佢帶領利華古遜踢出好成績交足功課。

主隊中前場有料到
利華古遜日前歐霸盃主場對烏克蘭嘅米達列斯，全場力壓對手，若非對方門將「上身」，肯定已響歐霸盃贏波。球隊前鋒傑斯寧表現雖未回復最佳狀態，但只要拿斯賓達、連拿度奧古士圖連同舒賀爾尼三位中前場球員發揮出應有嘅水準，應該可以將勝利送畀主場球迷。

慕遜加柏上周中同樣要出戰歐霸盃，不約而同都係「窿窿」摸和塞浦路斯嘅AEL利馬素，不同之處就係佢哋要作客，來回機程都要坐成八粒鐘，舟車勞頓腳骨力點都差啲。慕遜加柏呢支過氣神奇球隊，上季下半截已經打回原形，雖然佢哋現時聯賽排名比利華高，但睇番佢哋季初嘅對手只係賀芬咸同杜塞爾多夫，今晚仲要作客就唔多睇好嘞，小妹一於捧利華W。