開心不來梅有分加
2012/09/23文:Alwin
今日同大家研究德甲雲達不來梅主場鬥史特加，Alwin好耐都未見過不來梅教頭舒哈夫好似依家咁樂觀咁有衝勁，球隊開咧至今踢三場輸咗兩場，但無論球員同球迷都表現得好開心好團結，堅信球隊今季會有好收成，今晚面對殘陣史特加有信心取得主場兩連勝，Alwin撐1.78倍主Ｗ。

不來梅今季大換血，一批老將包括比沙路、拿杜、韋爾斯、保路斯基同施維斯達相繼離隊，但正如體育主管K阿羅夫斯講，呢批球員雖然有質素，但未能令球隊團結，佢哋喺場內場外分黨分派，場內又各自為戰，令到舒哈夫嘅戰術好難全面執行，但現時佢哋嘅位置分別由年輕當打嘅美亞列斯、奇雲迪布尼、謝比施拿斯、艾利亞同尼斯彼德臣取代，呢批球員最大優點係能夠貫徹執行舒哈夫嘅指令，真正做到上下一心。

史特加殘陣態沉
大家唔好睇小佢哋今季輸咗兩場，首仗作客僅負於多蒙特形勢唔係冇得踢，上仗作客不敵漢諾威更加畀球證屈，末段2比2時連續兩個入球被判詐胡，但第二個詐胡根本冇越位，明顯係誤判，佢哋其實有權攞晒三分，最可喜係輸完波成隊都冇沮喪，互相鼓勵互相安慰，今晚主場強陣出擊，力足擊退狀態欠佳，要分心歐霸，仲有射手伊比斯域等多名主力缺陣嘅史特加。

Alwin推介：
雲達不來梅勝★★★★

飛燕諾讓球勝★★★

賀芬咸大★★★