曼城金身破兵
2012/09/23文:蘇豪
英超大戰日好戲連場，除早場「雙紅會」外，衞冕嘅曼城會喺主場對阿仙奴。「兵工廠」三連勝轟入十粒，但對手全非一線球隊，今次對英超主場王曼城先係真正考驗。曼城橫跨三季英超主場三十一場不敗，勝出率超過九成，惡到冇朋友，兩大射手阿古路同巴洛迪利都可候命，人強馬壯，熱捧主勝！

阿仙奴頭兩場聯賽互交白卷，畀人彈到一文不值，跟住發力連贏三場兼射入十球，新射手普多斯基連續三場有士哥，連箭頭謝雲奴都翻生，又有大把人讚教頭雲格好掂！「兵工廠」能夠反彈，個人認為主要因為賽程唔難應付，作客贏利物浦同蒙彼利埃踢得唔錯，但對手並非頂級球隊，今次對惡爺曼城先係真正硬仗，到底後防係咪真係咁穩陣，一試就知龍與鳳，但缺少首席門神施捷斯尼把關，年輕門將文路尼都幾難予人信心！

曼城歐聯輸波一肚氣
曼城上季贏到英超冠軍，全靠主場靚績支持，由2010年12月尾至今，佢哋聯賽主場三十一戰未嘗敗績，錄得廿九勝兩和，勝出率超過九成，足足橫跨三季主場不敗，實在非常犀利！曼城簽埋右閘馬爾干及防中查維加西亞等人後，教頭文仙尼調動空間多咗，但最重要係王牌前鋒阿古路傷愈復出，「腦殘」巴洛迪利都可候命，加埋當弗箭頭泰維斯及中場耶耶托尼，人腳真係好強，即使中場拿斯尼受傷休戰，影響亦唔算太大。

曼城上場喺歐聯作客皇家馬德里踢得被動尾段反勝為敗，計埋上周聯賽作客賽和史篤城已經兩場不勝，係時候要打番場爭氣波。曼城上季主場贏阿仙奴一粒，今次希望重溫好夢，以球隊主場氣勢，有力再次擊退「兵工廠」。

馬會主W全球最低
馬會今場開出曼城主W低絕全球，未知係眼光獨到，定係香港球迷取向所至。睇番歐洲方面，多間博彩公司都將和波賠率調至3.5倍，部分進取型嘅細公司如希臘The Greek更低至3.35倍。