雷恩翻啅南錫
2012/09/25文:ComboKing

今晚受注賽事以盃賽做主打，阿King集中火力研究法聯盃第三圈，全甲組對碰雷恩主場鬥南錫，雙方近況都唔好，南錫連續四場冇波入爭勝機會微，捧有主場之利嘅雷恩W。

雷恩、南錫開季成績欠佳，頭六輪聯賽同樣僅得四分，目前排聯賽榜尾二及尾三，為未來護級前途着想，盃賽場合未必會去盡，不過雷恩有主場球迷支持，加上南錫四連敗兼冇波入，主隊勝算似乎較高。翻查紀錄，雷恩上季曾在國內另一盃賽法足盃六十四強贏過南錫3比0，踢盃賽特別有計，主W有1.65倍可作過關之選。

巴斯蒂亞翻身仗
另一場法聯盃由丙組梅斯越級挑戰甲組巴斯蒂亞，梅斯對上兩圈先後淘汰兩支乙組隊色當及杜亞斯，不過當時有主場之利，今次作客出戰隨時現形。巴斯蒂亞聯賽四連敗，主場係時候打場翻身仗，捧1.62倍主W。