Alwin今晚三場推介全部捧德國球隊，其中對L組漢諾威主場對西班牙利雲特最有信心，漢諾威重視歐霸盃，而且主場超勁力足擊敗下滑兼陣容不整嘅利雲特，Alwin捧1.58倍主Ｗ。

漢諾威出名主場猛料，上季係德甲唯一主場不敗之師，歐霸亦僅敗一仗，於八強戰不敵最終奪得冠軍嘅馬體會，今季主場維持強勢，近三場正式賽事全勝共轟入十二球，今季回巢嘅侯斯迪大放異彩，至今六場聯賽取得三個入球七次助攻，新加盟嘅蘇拜治迅速融入球隊，科特迪瓦射手耶高蘭亦重拾最佳狀態，喺主場出擊真係惡得交關。

利雲特喺上季以有限班費取得聯賽第六名令多支名牌球會汗顏，不過佢哋嘅特點同漢諾威一樣都係地頭蟲，今季西甲作客三戰全敗排包尾，啱啱仲慘吞奧沙辛拿四蛋，至於歐霸佢哋都唔叻，分組賽首戰主場僅以1比0小勝北歐弱旅希爾星堡，顯示狀態低於正常水準，今仗作客德國凶多吉少。

漢諾威勝 ★★★★

利華古遜勝 ★★★

史特加勝 ★★★