歐霸盃J組，其中一場由彭拿典奈高斯主場對熱刺。希臘球隊彭拿典奈高斯因財政問題，現時已由球迷組織接管。而為增強球隊收入，彭拿典奈高斯有必要喺歐霸盃爭取好成績。喺歐洲債務陰霾之下，希臘球員靠晒歐霸盃獎金去養妻活兒，鬥志肯定百分百，熱刺作客讓波必揀「讓球主勝」。

基於希臘經濟衰到貼地，彭拿典奈高斯老闆都相繼離開，亦將球隊交託畀球迷組織管理。但球迷財力有限，根本無法支付大牌球星薪酬，故今季只能提升青訓球員到正選隊比賽。雖然話呢班生牯仔大賽經驗不足，但勝在個個都天不怕地不怕，體力十足又爛打，熱刺要作客未必頂得住。老實講，熱刺近況的確唔曳，聯賽都贏過強隊曼聯，但略嫌熱刺近期賽程稍為頻密，球員未必可及時回氣，對住彭拿典奈高斯冇優勢可言。