德甲奧格斯堡主場對雲達不來梅，不來梅今季大換血後演出惹人好感，忠心教頭舒哈夫深信一班年輕球員有潛力帶領北方綠軍中興，佢哋已經將目標鎖定下季歐洲賽入場券，今晚面對質素平庸兼殘陣嘅奧格斯堡贏面甚高，不來梅作客小讓平半捧上盤。

不來梅目前6戰得7分排第8位，單睇積分唔算特別醒，但要留意佢哋今季所輸嘅3場波，其中兩場係對上季德甲冠亞軍多蒙特同拜仁，另一場係作客輸畀上季德甲唯一主場不敗之師漢諾威，作客多蒙特一役僅敗但形勢輸唔晒，對漢諾威更因球證誤判由贏變輸，上仗鬥拜仁亦只係踢到完場前10分鐘至失守，演出一啲都唔失禮，以近期整體演出嘅水準，今晚作客遇弱旅足以打場翻身仗，全取3分。

奧格斯堡經過6輪賽事只得2分排包尾，至今所得兩場和局，分別係對今季狀態差到你唔信嘅禾夫斯堡，同上仗因中場球員波利斯胡錫域車禍命危而無心戀戰嘅賀芬咸，其餘4仗每仗都淨輸2球，加上上季護級3大功臣贊斯、具滋哲同摩達斯繼續養傷，今晚面對強悍嘅不來梅真係唔夠踢，受讓一樣冇着數，上盤可捧。

此外，由今場起，德甲賽事都會接受角球大細投注，奧格斯堡同不來梅近期比賽都有一個共同特點，就係比賽中博得嘅角球唔多，奧格斯堡近兩場合共只得4個角球，不來梅近兩場加埋亦只得5個，呢4場波角球總數全開細盤，今場角球大細宜追細盤。