今晚英超壓軸大戰上演倫敦打吡戰，韋斯咸主場對阿仙奴。「錘仔幫」季初主場有料到，先後擊敗維拉、富咸及打和新特蘭，氣勢唔錯；阿仙奴雖然實力高一皮，但周中搏完歐聯，於「倫敦打吡」作客讓波好擇使，一於捧韋斯咸「讓球主勝」。

今季重返英超嘅「錘仔幫」表現相當唔錯，上場作客更以2比1擊敗大事擴軍嘅昆士柏流浪。領隊「大Sam」艾拿戴斯一改球隊以往華而不實嘅踢法，採取佢最出名拿手好戲嘅高Q大棍傳統英式打法，以卡頓高爾同埋安祖卡路爾作前線重心，華斯迪同馬菲查維斯側擊，配合中場路蘭、麥克盧保等實而不華球員，打法相當實際，雖然計往績韋斯咸好輸蝕，近四次對賽全敗，主場亦已六年未贏過阿仙奴，但球隊現時排喺聯賽榜第七位，力壓今場對手阿仙奴，絕對有機會破宿命。

兵工廠周中喺歐聯主場3比1擊敗奧林比亞高斯，暫時兩戰全勝高踞B組榜首，但歐聯賽事經常產生後遺症，阿仙奴今晚隨時又會手軟腳軟。無疑阿仙奴季初表現比預期理想，普多斯基及辛迪卡索拉完全融入球隊踢法，不過另一貴價射手基奧特表現仍然令人失望。球隊最大問題係後防打回原形，門將文路尼始終未能予人信心，而中堅哥斯尼更加成為上場聯賽輸畀車仔嘅罪人！

今場足智彩初盤開出韋斯咸受讓平半，莊家似乎對阿仙奴仍有一定信心，但韋斯咸踢法硬淨，加上打吡戰主場氣勢，相信「錘仔幫」可以保持不敗，所以向各位推介下盤韋斯咸及「讓球主勝」。另外，雙方都係入得又失得球隊，後防同樣唔穩陣，可以兼顧埋入球大！

韋斯咸 讓球主勝、大