卡卡回歸湊o靚仔 撐巴西-1掃克
2012/10/11文:笛子波童
國際熱身賽巴西於中立場瑞典鬥亞洲球隊伊拉克，焦點將會落在闊別國家隊兩年嘅卡卡身上。難得領隊文奴文尼斯畀機會，卡卡定必施展渾身解數證明自己，況且森巴兵團近來熱身賽態度認真，面對有世盃外圍賽後顧嘅伊拉克有力大勝一場，熱捧「讓球主勝」。

卡卡對上一次代表國家隊上陣係喺2010年南非世界盃8強不敵荷蘭，上年文奴文尼斯曾選過卡卡入伍，不過當時因為受傷而無緣披甲。卡卡季初喺皇馬缺乏上陣機會盛傳離隊，但佢嘅努力終獲莫連奴肯定，近期攞番唔少上陣時間，狀態亦逐漸冒升。

巴西平均年齡23歲
事實上文奴文尼斯一直認為依家呢支森巴兵團活力有餘卻經驗不足，平均年齡只有23歲，實在需要一名有豐富國際賽經驗嘅「老將」負起領軍重任，去年佢曾經重召「細哨」朗拿甸奴，今次輪到卡卡，目的顯然而見，相信卡卡為爭取出席2014年世盃決賽周，落場絕對唔會揸流攤。

巴西球員為博領隊歡心，近期熱身賽都踢得好認真，唔好忘記後衞丹尼爾、前鋒柏圖、中場甘素及盧卡斯今次因傷冇份入選，再加埋達施華兄弟、韋利安、費蘭甸奴、謝臣呢班邊緣國腳，預計未來爭位情況會更激烈，故此戰意無需要懷疑。

伊拉克有世盃後顧
伊拉克論人腳、實力本來和巴西已經差咗一截，而且佢哋下周中將於世界盃亞洲區外圍賽主場鬥澳洲，目前兩軍同得兩分仲未打開勝利之門，呢場可以講係生死戰，相信今場旨在練兵，唔會去得太盡，只要巴西打真軍，淨勝兩粒問題不大。