攞1分出線美國和波有偈傾
2012/10/16文:渡邊年

世界盃外圍賽中北美洲區同樣要開戰，A組有場美國主場對危地馬拉，兩隊依家同得10分，小組最後一戰只要打和，就可以將少3分排小組第3嘅牙買加掟走，美國佬一向利字當頭，呢啲場合仲同你講道義咩，扒冷直接買和波啦。

美國人一向大國家主義，又要做世界警察，乜都要認叻，實在成個國家由總統到華爾街啲「賓架」，個個都係利字當頭，當涉及自己利益時，嗰啲假仁假義就出晒嚟。依家A組美國同危地馬拉分列1、2位，多第3嘅牙買加3分，今仗最後一戰和波就出線殺入下一圈，明明開波企喺度唔使郁等完場都出線，搞咁多做乜？

同危軍夾計踢走牙買加
賽前美國球員喺人前扯貓尾，効力熱刺嘅丹普西話，呢場係「must win game」，一定要全取三分，但又冇講點解，轉過頭隊友米高巴特利就話危地馬拉好難踢，肯定唔易應付，壓力好大咁話。嘩，呢啲大龍鳳美國人就最鍾意做，真係信佢一成，雙目失明。危地馬拉小組首循環都係同美國打和1比1，你估美國佬唔驚呢場輸埋搞到出唔到線呀？大家穩穩陣陣，和波齊齊出線，搞好啲國家關係，係美國呢個國家一般外交處事手法，大家信嘅就跟少少和波啦。