袋鼠發老脾誓挫伊拉克
2012/10/16

世界盃亞洲區十強賽B組名牌球隊澳洲3戰過後仲未開齋，今次於中立場決戰伊拉克唔衰得，「袋鼠兵團」級數始終較高，今次齊集卡希爾、比斯安奴同尼爾等主力，三線都有個老臣子帶住班波，係時候贏番場向支持者交代，捧客勝！

澳洲於今屆世盃外十強賽三戰未贏過，除打和日本發揮較好外，其餘兩場作客對阿曼同約旦一和一負，演出令人失望，家陣得兩分在手，形勢麻麻。「袋鼠兵團」黃金一代開始老退，三線主力卡希爾、比斯安奴同尼爾年過三十，門神舒華沙更係四字頭，呢班球員經驗好，但活力不足，班新仔又未接到班，長遠睇真係唔掂。

不過，澳洲今次遇到開齋良機，伊拉克由於戰亂問題冇得於主場作賽，今場移師卡塔爾多哈舉行，令佢哋冇晒主場優勢。伊拉克前線擁有星級射手尤尼斯，攻力唔弱，衰在防線唔穩陣，上次同巴西拍跳淨吞六蛋，話就話對手級數高，但條防線甩漏好多，真係幾得人驚，今場未必頂得住澳洲，受讓都信唔過。

同組阿曼主場對約旦，約旦近年足球水平不斷提高，上次戰勝澳洲絕非符碌，今次對住阿曼有得受讓，盤口有利，可捧下盤！