意大利保守埋丹開細
2012/10/16文:巨高
世界盃歐洲區外圍賽B組意大利主場對丹麥，比賽安排喺聖西路球場進行。兩軍牌面於此組高晒，今場可謂首名出線關鍵，相信大家一定踢得謹慎，細盤可取。

自從意大利改由柏蘭迪利執教後，球隊控球時間明顯增多，但唔等於意大利攻力有改善。實在控球在腳只係過程，把握能力先至係重點。而今時今日藍軍前場最大問題，就係缺乏一個真正機會主義者，呢點大大影響球隊入球能力。雖然好多人都讚奧斯華度及巴洛迪利有料到，但比較起大家以往所熟悉嘅韋利、恩沙基及東尼等，略嫌二人級數不足。要留意今場保方因傷缺陣，冇首席門神護住大門，意大利或者會打得更加保守，未必會放膽上前進攻。

丹麥死火勢穩守
至於丹麥同樣欠入球殺着，前鋒賓特拿基本功麻麻就係人都知，如果唔係點會畀人笑係「中堅賓」。丹麥近兩場外圍賽對捷克及保加利亞都係入得一球咁大把，其中作客保加利亞在下半場打多個都未能入波，面對防守穩健嘅意大利，丹麥要有「士哥」都唔易，捧細盤就最啱數。

另外，今場比賽將為非洲兒童關注組織籌款，球員入場時會手持寫上鼓勵字句嘅紅色氣球，希望大家可對受饑荒及戰亂困擾嘅兒童多加關注。