拜仁食塞隨時骾親
2012/10/20文:SAMVO肥叔

剛過去周中國際賽日提醒大家要防名牌國家隊，結果真係有幾隊出事，德國贏住四球都畀人追番，上盤客真陰功，大戶有先見之明，賽前狂插瑞典下盤，結果順利得手，睇得好準！德甲名牌球隊拜仁慕尼黑有唔少德國國腳，國際賽搏完冇耐，話咁快又作客杜塞爾多夫，讓得多好牙煙，呢場一於博下盤！

「前三後三」有參考價值
肥叔貼波特別重視「前三後三」，睇番對上三場績，睇埋對落三場波，慢慢推敲球隊意向，呢種方法好簡單，但非常有效，若果心水清，分分鐘叻過班計數佬！拜仁球星於國家隊耗力多，嚟緊又要喺歐聯搏命，今次場波夾正喺中間，都幾尷尬，老老實實，贏唔贏到都好難講，仲要讓超過一球，真係太多喇，呢場唔信名牌，博下盤！

同日英超賽事富咸主場對阿士東維拉，富咸人腳變動多，踢落就冇乜走樣，都係「主強客弱」，唔算難捉，呢班波今季主場惡，輸畀爭霸分子曼城冇得講，但對同級球隊搏殺非常準繩，今場讓半球，絕對係出擊好時機，要上盤！另外，英超名氣球隊阿仙奴作客諾域治又係讓得多，「兵工廠」下周中要應付歐聯，唔似大勝，小注下盤。