馬拉加打落水狗
2012/10/24文:巨高
近期衰到貼地嘅AC米蘭將出戰歐聯C組第三輪賽事，今場對手係佔主場之利嘅「西甲曼城」馬拉加。AC喺歐聯雖然兩戰不敗，但其實兩場都冇乜睇頭，嚴格嚟講可以話符碌，今場作客更難睇好。相反馬拉加愈踢愈有，走勢比AC好得多，相信可以再勝，進一步鞏固小組榜首地位。今場主W應可順利開出。

AC米蘭衰到冇朋友，盛傳老闆貝魯斯干尼眼見球隊毫無起色，特登打電話畀前球員加度素及尼斯達，希望佢哋加入教練團以增強士氣，但二人對回歸球隊協助現任教練阿里基嘅興趣唔大，加度素仲話阿里基一日唔走，佢都唔會返AC。

AC星散 阿里基見底
實在以貝老闆性格，阿里基應該早就執包袱，奈何幾位合適人選都話未準備好，所以兩大巨頭包括加利安尼及貝老闆都要繼續做戲，聲稱對阿里基仍然有信心。

當日阿里基能帶領AC贏意甲冠軍，全靠有伊巴謙莫域、堤亞高施華及卡斯辛奴等球星助陣，依家個個猛人都走晒，阿里基即刻見底。相反，馬拉加早就擺脫欠薪消息所帶來嘅負面影響，無論聯賽定歐聯都踢出高水準，今場面對「冇牙老虎」AC米蘭，相信馬拉加可以喺主場輕鬆勝出，主W冇走雞。