史浩克右路最生猛
2012/10/24文:車車
雖然今晚歐聯聚焦喺西法倫球場上演嘅「多皇大戰」，但其他賽事嘅重要性都絕不遜色，尤其是啱啱贏咗多蒙特嘅史浩克04，佢哋喺B組作客阿仙奴，只要贏波就能夠將對手壓落去，對爭取首名出線好有幫助。

法芬內田篤人合拍
阿仙奴上場聯賽對諾域治真係打得好差，諾域治之前畀其他球隊數到班主係邊個都唔認得，點知就清脆擊敗阿仙奴，賽後好多槍迷都呻球隊表現差，輸畀一隊今季聯賽七場未贏過嘅諾域治，認真濕滯。至於今晚作客嘅史浩克04，啱啱對多蒙特嗰場波，法芬表現非常落力，雖然冇波入，但多次同賀治比及內田篤人喺右邊做到唔少威脅性攻勢，面對住後防唔多信得過嘅阿仙奴，隨時作客都入到波。

不過，史浩克04後防都唔係特別穩陣，好多時贏波都有失波，難淨勝對手，佢哋之前歐聯對蒙彼利埃90分鐘領先2比1都由贏變和，對奧林比亞高斯亦有失波，再加上史浩克近11場有9場開大，今仗雙方都咁飄忽，要揀邊隊贏等即場會好啲，所以呢場我只會揀入球大，希望兩隊可以有場激戰。