曼城搶W將士用命
2012/10/24文:笛子波童
歐聯D組賽事曼城作客鬥阿積士，曼城頭兩輪分組賽只得一分，今場再贏唔到出線前途凍過水。阿積士兩戰全敗根本未夠班踢歐聯，面對求勝心切嘅「逆轉高手」曼城等做炮灰，1.75倍客W非常值博。

曼城連續兩屆身處歐聯死亡之組，估唔到今屆形勢發展同上屆好相似，佢哋上屆頭兩輪面對拜仁、拿玻里僅得一分，然後第三、第四輪主客雙殺包尾嘅維拉利爾，保住出線希望，波童唔敢講佢哋今屆最終能否出到線，但以球隊人腳及決心，相信可以一如上屆於未來兩仗全取六分。

阿積士星散淪炮灰
阿積士頭兩場分組賽均輸波，其中主場面對皇馬冇優勢之餘仲要全場捱打，擺明唔同級數。今季球隊放走雲達韋爾、維頓漢、安尼達，防線重新執位，雲連積、戴利白蘭特、艾達韋列特都係二十出頭嘅小伙子，淨輸經驗都輸死，而且陣中主力射手史基賀臣有傷在身，目前於前線擔大旗係過晒氣嘅賴恩巴布，便知球隊人才幾凋零。

阿積士上周末聯賽對荷華高斯一度領先三比一，但最終都被逼和失兩分，對士氣、信心有一定打擊，相反曼城近期再顯「逆轉高手」本色，近兩次作客賽事都在先失波情況下反勝對手，表現唔突出但勝在有鬥心，其中後備殺手迪斯高擔當一個重要角色，個人獨取三球，另一箭頭阿古路上場聯賽只係做後備，似乎想留力今場搏殺。唯一隱憂係中場大衞施華有傷料倦勤，但只要將耶耶托尼推前改任進攻中場一樣具效率，影響應該唔太大。