疲兵難炒QPR「讓球和」啱數
2012/10/27文:麥馬拿仁
除曼城外，「衰波」阿仙奴再度出場，想大炒昆士柏流浪有難度！主隊續有禾確特等缺陣，韋舒亞又未弗，加上兩連敗頹勢，面對昆士柏惡啃。今場係小倫敦打吡，料阿仙奴僅能小勝，博「讓球和」！

廠仔食咗瀉藥
一次國際賽周，搞到阿仙奴冇啖好食，成班球星好似食咗瀉藥一樣手軟腳軟，首先上輪聯賽輸畀諾域治，跟手周中歐聯就算坐鎮主場，都要淨吞史浩克04兩蛋。兵工廠兩場波完全谷唔起，最慘係一粒都入唔到，難怪畀己隊球迷噓爆。今仗兵工廠除「禾仔」缺陣外，仲有戴亞比、路斯基等傷兵，而阿歷士張伯倫亦九成唔出得；但佢哋畢竟高QPR兩班波，又有主場之利，最重要係球隊已再承受唔起失分，相信力足小勝。

QPR於聯賽仍未開齋，上仗打多個被愛華頓逼和，實際演出已大有改善。領隊曉士棄用安頓費迪南，令後防較為穩陣，而且亦成功激起球隊鬥心，今仗去到酋長球場力足考驗主隊。QPR近四場輸波都係輸一球差距，而近兩對賽勝負都係一球上落，揀「讓球和」啱數。