拜仁弗爆半場大起里
2012/11/07文:車車

如果話歐聯D組係「死亡之組」，咁以暫時形勢睇，F組就可以叫做「魔鬼之組」喇！事關其中三隊都係有6分在手，三條「6」名副其實啦！呢組形勢最混亂，三隊同分實爭崩頭，但今日我不但唔怕亂，重特登揀咗拜仁慕尼黑主場對里爾做心水場次！

拜仁上周末德甲作客漢堡以「夫添」全力應戰，梗係啦，之前畀利華古遜破咗聯賽不敗身兼終止連勝紀錄，一定唔敢再輕敵。場波雖然係雨戰，拜仁又作客，但表現好到反客為主，列貝利獨食一輪冇作為，之後即轉態度造就隊友，加埋舒韋恩史迪加、卻奧斯同湯馬士梅拿個個都弗，基本上入完三球後，大家都係當練波咁踢。

里爾０分焗搶
暫時有兩隊喺歐聯分組賽仲係0分，里爾就係其中一隊，佢哋近3場不敗，近況雖然叫好番啲，但之前喺歐聯作客對哥本哈根同華倫西亞咪一樣要輸！上輪里爾就算有主場之利都輸畀拜仁，踢落完全唔同級數，話晒拜仁係上屆歐聯亞軍，里爾上屆則分組賽止步，邊夠踢吖！

論人腳，拜仁贏；論士氣，又係拜仁；論往績，都係拜仁；講近況，拜仁梗係贏啦！雖然睇牌面拜仁要爭取贏波兼多「士哥」，但入球大細中位數3.5球，買大盤可能有危機，加上拜仁蠱惑多多，即場睇表現再買都未遲啦！買主勝、半場主勝同讓球主勝又熱得滯，不如博個半場大好過。要兩球啫，拜仁3場歐聯都失4球喇，而且攻得兼個個狀態都咁好，半場大穩陣。