馬拉加「半場和」冇甩蘇
2012/11/10文:法達斯維
今晚西甲壓軸尾場，由剛於歐聯出線嘅馬拉加主場迎戰皇家蘇斯達。雖然馬拉加士氣如虹，但因為於歐戰搏得好盡，故一班老將未回得切氣，好彩對手蘇斯達出晒名係作客蟲，早段同對手玩拉布冇難度，「半場和」值得捧場。

蘇斯達作客保守
由於馬拉加班主拒絕再泵水，因此歐聯呢個金礦成為眾將「續命」關鍵，喺教練「工程師」比歷連尼領導下，馬拉加同心協力場場拚盡，終於喺周中賽和AC米蘭，提早出線16強。不過，同其他要出戰歐聯嘅豪門球會相比，馬拉加板櫈深度明顯唔夠，比帥用來用去都係得14、15人，唔攰就假喇！因此之後踢聯賽，總係表現得舉步維艱。睇番該隊近五次歐聯後嘅聯賽戰績，無獨有偶都同對手於半場打和，明顯班老將祖亞昆、辛達告魯斯及沙維奧拿等未回得切氣，惟有於初段鬥磨打拉布戰。幸好今仗只係對住作客曳到唔恨嘅皇家蘇斯達，呢支巴斯克兵團自知一離開主場便腳軟，所以會踢得更保守，預計雙方上半場會不思進取，既然呢個「半場和」咁好路，有成2.25倍確實抵玩。