法福唔識守啱拜仁胃口
2012/11/10文:蘇斯黑柴
德甲拜仁慕尼黑主場迎戰法蘭克福，雖然話係聯賽榜第一對第三，不過班霸拜仁愈戰愈勇，相反法蘭克福近期表現明顯回落，拜仁質態皆超班又有主場之利，加上法蘭克福不擅守，今場大炒味濃，1.42倍拜仁「讓球主勝」可作過關重心，若嫌賠率乏味，可以博埋1.88倍中位數3.5球嘅大盤。

拜仁今季開得極順，聯賽已經掟甩次席嘅史浩克7分，啱啱周中歐聯主場更以6比1大炒里爾，於小組位列榜首，一雙魔翼列貝利同洛賓再次起飛，老將比沙路大發神威連中三元，連隊長拿姆亦貢獻3次助攻，幾乎所有球員都弗到爆。大家唔使擔心拜仁會因為喺聯賽領先得多而手軟，皆因佢哋已經失落咗兩季聯賽冠軍，上季曾經以更大幅度領前最終都畀多蒙特反先，受過教訓唔敢大意，何況下周中又冇歐戰任務，今仗一定乘勇盡炒。

法蘭克福近況跌Watt
法蘭克福係今季最強升班球隊，季初憑主攻踢法攞到超乎想像好成績，其中主場以3比3逼和衞冕嘅多蒙特最令人難忘，不過當時多蒙特正處低潮，而法蘭克福現時已見滑落，目前雖然仲位列三甲，但近兩場作客先後輸畀慕遜加柏同史特加，上仗主場對弱旅格雷特霍夫，一早領先都捱唔到尾，表現令人失望。何況佢哋向來唔識守，今仗作客一樣會畀到主隊大把進攻空間，啱晒拜仁胃口。