hea碧數臭費格遜
2012/11/11文:麥馬拿仁

今期《最佳男主角》，麥馬拿仁請來貝碧托夫做嘉賓。呢位前保加利亞國腳，好波係人都知；但更為人所熟悉嘅係佢個朵：「hea碧托夫」。佢一向恃才傲物，態度又寸寸貢，究竟呢名麻煩友點睇外間評價？憎唔憎曼聯舊老細費格遜？未來有乜計劃？依家一次過話晒你知！

「hea碧」一向唔算friendly，好 啲叫愛恨分明，唔好 就唔識撈，講起自己個朵，佢火都嚟埋：「邊個講得出呢個名，邊個就唔識波。踢波係食腦嘅，唔係吓吓靠鋪牛力，數據係死嘅，實際表現先至最重要，你知唔知英超2010-11年球季邊個係神射手？係我呀！効力曼聯咁多年，我每次落場、操練，都獻出百分百努力，喺曼聯隊中冇人可以質疑我，我離隊時候，絕對可以抬高個頭。」

提起被cut鐘仍扯火
攞完神射手，翌季就被當臭四，以貝碧性格一定分外難受。講起費格遜，佢就起晒火：「以一個人嚟講，佢都算衰格，我唔會再尊敬佢。2011年歐聯決賽我冇份打，之後我問老費仲需唔需要我，佢話需要，話如果我有狀態，就一定有得打。但第二季結果係點，唔使我再講啦。以我質素同貢獻，唔通值得畀佢咁樣糟質？但以成就嚟講，佢係全球最佳領隊，但呢樣嘢同人格唔掛鈎。」

退出國家隊兩年，你有冇復出打算？「我冇咁諗過，依家佢哋踢得幾好吖。同埋最重要一點，係我睇唔到陣中有任何球員，係好似我咁用腦踢波囉。」