利物浦蓄勢剷「車」
2012/11/11文:麥馬拿仁
遇強愈強，利物浦作客唔赦車路士！英超今輪爆發「藍紅大戰」，車路士主場迎戰利物浦，表面上車仔人腳和狀態佔優，但上周中啱啱喺歐聯搏得好盡，球員身心俱疲；相反紅軍於歐霸盃畀主力休息，以逸待勞有着數。加上利物浦近年可謂係車仔剋星，近5次非中立場對戰全部贏晒，好有格食格味道，紅軍受讓捧「讓球客勝」！

惡戰連場藍戰士搏殘
熟悉利物浦特性嘅朋友，都知呢班波好多時都估佢唔到，睇好佢哋嗰陣表現可以衰到貼地；相反睇死佢哋輸硬，就會打出超水準，搞到滿地眼鏡碎。紅軍一向擅打下風波、鬥志波，打和曼城同愛華頓兩仗，唔贏認真唔抵；今次又會發揮小宇宙，殺上盤客一個措手不及。領隊羅渣士目標為本，講明重聯賽、輕盃賽，上周中作客安治時，隊長謝拉特、蘇亞雷斯、紐尼沙軒、祖阿倫、丹尼爾艾格、史達寧等九成主力都冇飛去俄羅斯，全部留喺英格蘭休息，抖夠之後造訪倫敦，備戰做到足，估計會有理想發揮。另外右閘格連莊臣已經傷愈，陣容完整更添攞分籌碼。

車路士自上月底歐聯不敵薩克達後，面對三線作戰明顯吃力，兩鬥曼聯法定時間贏唔到，上輪聯賽鬥史雲斯又要失分，連榜首位置都失埋。上周中於史丹福橋再鬥薩克達，眾將個個搏到盡，要靠域陀摩西斯士哥先絕殺對手，無論身心都處於疲憊狀態。

費托倒戈例冇