富咸殘陣正路輸1粒

車路士喺英超五場不勝，撇開之前四場唔計，上仗賓帥上任首戰主場和曼城場波算係有啲進步，佢哋成功終止連續十場有失波紀錄，起碼穩住後防。車仔前線仍然需時再執，有傳中鋒費蘭度托利斯在更衣室遭孤立，但有契爺阿布及肥賓照住，慢慢會回復信心，今戰有機會結束四場冇士哥頹勢。車仔今戰好想贏，但佢哋近四次鬥富咸和晒，再之前兩場贏波都係煲魚生粥，唔係高好多咋！

富咸今季踢落有進步，若然齊腳絕對有本錢偷雞，可惜佢哋中前場進攻主力拜仁雷斯同卡加尼基歷都要養傷，搞到要貝碧托夫墮後返中場派牌，前面個陣郁晒發揮唔多順，今戰仲有防線重心軒治蘭特坐波監，要用阿仙奴棄將辛德路斯打中堅，真係見到都怕怕，好難頂住車仔進襲。今場主勝冇肉食，博賓帥領軍小勝一粒開齋，要「讓球和」！

費托遭孤立 急需贏富咸

車路士新帥賓尼迪斯不得民心畀球迷噓爆，今次英超快車期喺主場同富咸合演倫敦打吡戰，車仔仍然讓得狠，主Ｗ熱至1.36倍，如非賓帥fans或死忠車迷，真係買唔落手。車路士近季鬥親富咸冇場輕鬆，今次博佢哋小勝一粒，冷敲3.6倍「讓球和」！

賓尼迪斯上任首戰喺史丹福橋畀車迷噓足全場，若想改變現狀，首要任務係交出靚績令球迷心服口服，要做到呢一點，最緊要係班兵肯為佢賣命。車仔門神施治見住咁多名帥人來人往睇化晒，短短幾句講出車仔球員應該點做：「一係適應，一係離隊，就係咁簡單！」賓佬做車帥已成事實，唔幫手即係同老細阿布拉莫域對抗，相信冇乜人敢亂嚟。