希斯菲特畀料拜仁贏3:2

多蒙特周中主場對杜塞爾多夫之役，除收起有傷嘅馬里奧葛斯同曉姆斯外，喺領先一球後仲先後收起隊長基爾同靈魂馬高列奧斯，結果留力留出禍，末段畀杜塞爾多夫扳平，令佢哋進一步遭拜仁拋離，不過佢哋無論任何情況遇強必拚，近季作客拜仁固然踢得出色，就算今季歐聯作客對住西甲冠軍皇馬同英超冠軍曼城都攻到對手氣咳，今晚和波對聯賽形勢完全冇幫助，當然唔會保守，不過後防重心曉姆斯上陣成疑，作客安聯搶攻難保不失。

今仗預期係對攻格局，前拜仁教練希斯菲特預測拜仁今仗贏3比2，黑柴亦相信入波唔會少。

蜂針拮死仁
拜仁今季初曾在德超盃擊敗「蜂兵」多蒙特，不過睇番過去兩季5次碰頭，拜仁全部輸晒，當中多蒙特波蘭前鋒羅拔利雲度夫斯基可以講係拜仁頭號剋星，最近3次交手都有士哥，共入5球，包括上季德盃決賽連中三元，拜仁後防一定要實佢。

拜仁勢報復圍剿多蒙特 
 

德甲國家打吡拜仁慕尼黑主場迎戰多蒙特，今場德甲最強戲碼將有史上新高嘅203個國家及地區直播，打破過去最高200個舊紀錄，名副其實係焦點大戰。黑柴認為雙方目前形勢上已冇乜壓力，必然對攻爭勝，投注首選係1.62倍大盤。

拜仁經過14輪聯賽後累積37分，提早3輪鎖定首循環冠軍，已拋離次席利華古遜10分，較今仗對手多蒙特多11分，壓力唔大，不過今仗對手多蒙特係佢哋近季眼中釘，除連續兩季搶去聯賽冠軍位置外，亦喺多次交鋒中擊敗拜仁，令德甲班霸面目無光，難怪拜仁賽前矢志復仇，門將紐亞揚言今仗必勝。佢哋周中贏弗賴堡一役，副隊長「小豬」舒韋恩史迪加休戰未有落場，擺明留力今仗，雖然路爾斯古斯達禾同洛賓繼續養傷，但拜仁近期冇咗佢哋一樣頻頻交出最佳水準。

近10次德甲打吡
球季 賽事 戰果

12/13 德超盃 拜勝2:1

11/12 *德盃 多勝5:2

德甲 多勝1:0

德甲 拜負0:1

10/11 德甲 拜負1:3

德甲 多勝2:0

09/10 德甲 拜勝3:1

德甲 多負1:5

08/09 德甲 拜勝3:1

德甲 多和1:1