默契波再現歐聯戰場？今晚上演最後一輪歐聯分組賽，E組榜首薩克達同祖雲達斯只要打和就雙雙晉級，可以夾手夾腳踢走上屆冠軍車路士，現時全球大部分莊家低開和波賠率至2倍以下，似乎已有啟示，喺各界睇好下，唔知呢場默契波會唔會順利開出和局呢？

車路士請咗賓尼迪斯領軍後愈踢愈沉，全球車迷民怨沸騰，大軍若想保住晉級機會，今輪主場鬥魚腩洛斯查蘭特非勝不可，贏波屬基本要求，上次佢哋作客洛斯查蘭特都淨勝四球，返主場有力炒多鋪，大細中位數改為3.5球，照捧大盤！

賓尼迪斯領軍三戰兩和一負，令車路士不勝走勢增至六場，大軍深陷低潮，車迷「倒賓」之聲不絕。肥賓不得球迷歡心，好在仲有老細阿布照住，班兵唔敢亂嚟。車仔今次任務好簡單，贏洛斯查蘭特拎三分，再望薩克達幫手砌低祖記，形勢被動，但未算絕望，唔好諗咁多，先做好本分。

車路士續有兩大老臣子泰利同林柏特缺陣，其餘主力都可候命，球隊極需一場大勝振奮士氣，特別係射手費蘭度托利斯長期冇貨交，好想爭取士哥重拾信心，對住分組賽五戰失十六粒嘅洛斯查蘭特唔入波等幾時？此外，域陀摩西斯及馬高馬連等副選想爭上位，有得落場實砌盡，唔使擔心佢哋領先後hea住踢。

丹麥洛斯查蘭特分組賽五戰一和四敗完全唔夠班，兩場作客輸晒零士哥失六球，冇乜反抗能力，今戰仲有防線重心奧哥尼缺陣，弱上加弱，大敗機會高！