意甲等緊下一個貝老闆

曾幾何時，意甲被稱為小型世界盃，當時聚集咗世界最多嘅足球明星，所有成名嘅球員都以喺意甲踢波為榮，受關注度僅次於世界盃，英格蘭足球？對唔住，唔入流。

八十年代尾至九十年代風靡全球嘅三頭馬車、米蘭王朝、意甲七姐妹，到明星球員柏天尼、荷蘭三劍俠、神奇小馬尾、巴迪斯圖達、至後期嘅托迪、朗拿度及施丹……但依家意甲唔掂，其實一個字講晒：錢。

由二次世界大戰完結至到六十年代，意大利從貧窮嘅農業社會發展成歐洲主要工業大國，史稱「意大利經濟奇迹」。喺1936年出世嘅AC米蘭會長貝魯斯干尼，就係受惠於呢個經濟成果，由於人民富庶，開始關注生活環境，貝魯斯干尼喺62年成立咗一間建築工程公司，建造咗第一個全封閉自給自足嘅居民區，喺市場撈到第一桶金。

其後意大利經濟亦一路發展，於1985年同美、日、英、法、西德及加拿大為世界七大經濟強國，七國嘅國民生產總值達75,556億美元，佔世界國民生產總值47.2%，國內體育發展亦去到高峰，82年擊敗西德高舉世界盃，並且成功申辦90年世界盃。

非常時期用非常手段
同時間貝魯斯干尼於86年買下AC米蘭，將呢間老字號球會帶到另一個境界，由88年至95年八年間，贏得4個意甲冠軍、3屆歐洲聯賽冠軍盃、2次洲際盃、4次意大利超級盃、3次歐洲超級盃，16個正式冠軍，就係呢個「米蘭王朝」吸引住世界眼光，可以話意甲嘅風光係由貝魯斯干尼一手打造。

不過，意甲之後就因為多個問題被打沉，「仇富」、「政治鬥爭」令貝魯斯干尼疲於奔命，連電視直播因為各球會錢開眼，同貝魯斯干尼擁有嘅電視台鬧翻，中間人拆帳問題，搞到四分五裂，想欣賞意甲好似要「集郵」一樣，要擁有不同球會或地區直播權先有得睇，絕對影響。「造假」更係致命傷，球迷根本冇興趣買飛入場，睇一場事前已經安排好嘅「戲」。

今時今日，意甲要再搞好，相信要等待一個強人，一個強勢、懂得非常時期用非常手段嘅強人。