4強艾阿里「大」起哥連泰斯

四強首戰由非洲冠軍艾阿里面對巴西勁旅哥連泰斯，艾阿里上場擊退廣島三箭發揮理想，名將阿布捷卡寶刀未老，今場雖成冷門，但並非完全冇得打。南美代表哥連泰斯擁有前漢堡秘魯射手荷西古里路，仲有巴西國腳荷西保連奴等猛將在陣中，火力甚強，預期今戰入波多，捧大！

蔚山有料到唔怕三箭

世界冠軍球會盃第五名爭奪戰由亞洲雙雄對決，日職王者廣島三箭於豐田球場鬥南韓勁旅蔚山現代，蔚山大批球員去過日職搵食，熟晒三箭打法，佢哋今年稱霸亞洲表現突出，家陣韓職水準明顯高過日職，三箭讓唔起對手，要「讓球客勝」。

蔚山現代好多球員去過日本搵食，主力射手李根鎬、拉芬夏同李昇烈踢過大阪飛腳，隊長郭泰輝屬京都不死鳥舊將。今季呢班球星夾手夾腳捧走亞冠盃，呢次去到日本打世冠盃，首戰不敵墨西哥勁旅蒙特雷輸級數，但對住日本代表廣島三箭絕對未驚過。

日職球隊喺今屆亞冠盃冇料到，早於十六強已經全軍覆沒，國內聯賽亦鬥到亂晒龍，最終由廣島三箭爆冷奪冠，不過，呢支冠軍隊踢落其實冇乜霸氣，打大賽經驗又唔多，唔好睇得太高。