拜仁慕遜駁火 歇冬前玩大佢！
2012/12/14文:蘇斯黑柴
德甲獨腳戲拜仁慕尼黑主場鬥慕遜加柏，今輪係德甲歇冬前最後一輪，兩軍現時前線狀態火熱，但防線陣容不整，黑柴預期今仗係入球騷，大細中位數調整到3.5球照捧1.95倍大盤。

拜仁今季全面爆發，歐聯以小組首名殺入16強，聯賽更拋離次席利華古遜達11分之多，不過教頭軒歷基斯仍然面臨壓力，皆因會方正考慮喺明年夏天搵前巴塞隆拿主帥哥迪奧拿代替佢，佢唯一可以做嘅，係帶領球隊贏得愈多愈好。事實上軒歷基斯球員時代曾經係慕遜加柏嘅傳奇射手，而今季為拜仁踢足每一場聯賽嘅中堅丹迪亦係由慕遜加柏過檔，兩人倒戈遇舊主，戰意更鮮明。

路明尼加想三箭齊發
拜仁上季喺德甲遭慕遜加柏雙殺，近6次對賽只贏過1次，德甲班霸今仗喺2012主場謝幕戰點都要攞尾彩，何況球會高層路明尼加日前放言，話陣中擁有文迪蘇傑、馬里奧高美斯同比沙路3名頂級鋒將，只有1人上陣相當嘥料，軒歷基斯當然收到，相信佢會喺適當時間畀多個前鋒落場，甚至尾段用晒3箭頭一圓高層心願。不過拜仁防線有畢斯杜巴繼續養傷缺陣，謝路美保定同雲拜頓都有輕傷在身，門將紐亞周中亦因為胃病缺練，未必可以交出十足狀態。

慕遜加柏近期明顯回勇，近6場正式賽事4勝2和保持不敗，老將艾蘭高今季狀態巔峰，多次射入令人嘆為觀止世界波，箭頭漢基同靴爾文近期重拾射門鞋，而今季重金加盟嘅荷蘭射手盧克迪莊較早前喺歐霸傷愈復出，後備落場唔夠10分鐘即刻入波，可見佢哋鋒力亦唔簡單，但防線唔齊腳，左閘艾華路杜明基斯停賽，要由擅攻不擅守嘅雲特頂上，主力中堅兼隊長達姆斯因傷缺陣，由今季甩漏甚多嘅老將保華斯替代，作客面對拜仁強攻唔易頂，入球大係首選。