日晨英冠有兩場賽事，其中打比郡主場鬥侯城旗鼓相當，捧大最啱。打比郡主場鋒力強勁，森蒙、迪奧羅賓遜同泰臣個個有力數胡；侯城借將門將大衞史托達回歸富咸，大大影響防守力，雙方入波唔會少！

打比郡於尼祖哥洛夫帶領下，主場出擊一向有計，如齋計主場成績，目前「綿羊」排第5，而入球數字更高踞第3位，絕不能睇小。呢班波喺自己地頭絕對唔會縮，於「攻擊鐵三角」帶領下，撕破對手大門毫無難度，今場開出平手盤，主隊值得考慮。不過侯城狀態大勇，就算作客亦有力取分，而球隊正選門將大衞史托達已經重返富咸，呢場分分鐘係場入球騷，大盤可期。

另外睇多兩場法乙，昂熱作客杜亞斯，客軍非常正氣，近期只係輸過畀勁旅卡昂同南特，相反杜軍死氣沉沉，主場都讓唔起，捧「讓球客勝」。另一場尼姆主場對尼奧特，客軍後防曳到暈，頂唔住主隊猛攻，捧主W。