麥卡菲帶起葉士域治
老一輩嘅英格蘭球迷都會知道，綽號「拖拉機男孩」嘅葉士域治曾經有風光歷史，如今嚟到英冠，季初仲淪落榜尾，會方痛定思痛，搵到經驗豐富嘅麥卡菲執教，除咗期待佢幫球隊護級，仲有野心希望未來幾季內回升英超，麥卡菲上任僅兩個月已交足貨，球隊近7場取得5勝1和1負佳績，成功走出降級區，葉士域治喺進攻方面表現大幅改善，上周末作客以2比0擊敗麥卡菲前僱主狼隊，一吐烏氣，呢隊處於升勢中嘅球隊目前冇傷冇病，今晚返主場可望乘勝追擊。

另一邊廂，由前車路士名將普耶帶領嘅「海鷗」白禮頓卻處於跌勢中，季初係威係勢居榜首，但近期每況愈下，排名倒退到中游，近5場聯賽3和2負未贏過仲勁失10球，啱啱喺主場以1比3輸畀屈福特，最大問題係入球能力下滑，近3仗3個入球有兩個靠12碼，主場慘敗後匆匆再戰，作客面對當起嘅葉士域治好難轉弱為強。