修咸頓疲兵係咁仙
今晚英超壓軸好戲修咸頓主場迎擊阿仙奴，作為護級分子，前者防線又再故態復萌，上仗更於打多一個情況下，頂唔住史篤城嘅狂轟猛炸，被連追兩粒逼和，咁樣跌咗兩分都咪話唔傷，今輪仲遇到由弗到爆燈嘅禾確特領軍、火力全開嘅阿仙奴，整定做炮灰喇，斯維認為「兵工廠」可食住個勢反客為主，一於直取客勝。

老實講，修咸頓主帥艾堅斯近期亦面對現實，放棄季初開放式嘅進攻打法，用番經驗較好嘅老門神加雲戴維斯，果斷將烏龍王中堅凱維特貶為後備，配合防中舒尼達連同積克確克作屏障，失球數字亦有所下降。可惜，畢竟質素有限，上仗又失驚無神用番凱維特，即刻出事，當史篤城派出高治、堅韋尼鍾斯、謝路美同約拿芬禾達斯四前鋒強攻，修咸頓迅速打回原形，打多人一個都係守唔住，最終於領先兩球下被逼和3比3，失分之餘，亦嚴重打擊球員嘅信心，防線咁鬼曳，抗壓能力又咁低，「聖人」點搶分護級呀？

阿仙奴禾確特弗爆
相反，阿仙奴領隊雲格自改用禾確特打中鋒，成功走出谷底，禾仔猶如亨利上身咁踢到曉飛，唔單止近三仗入四粒，其靈活飄忽嘅走位配合，為普多斯基、辛迪卡索拉、阿歷士張伯倫製造好多後上入楔空間，整條鋒線着晒火，上仗大勝紐卡素7比3，連後備入替嘅基奧特都省兩粒，真係有辦你睇。首循環阿仙奴曾大炒修咸頓六個一皮，何況「聖人」之前連踢兩場作客賽事，眾將疲於奔命，「兵工廠」再贏一場冇難度，客勝有1.64倍咪嫌少呀。